NYTT FRÅ VYRDE MANNSKOR

Vyrde Mannskor og Vox Virorum fekk gode tilbakemeldingar av publikum etter ekte mannskor-konsert i Hareidhallen søndag 24.oktober.

Etter mange arrangement over fleire dagar på Hareid, var det over forventning at det møtte opp nær på 200 for å høyre vakker mannskorsong.

Vox Virorum gjorde som vanleg eit solid inntrykk med eit repertoar som spente  frå norske folketoner og viser til verdslege songar. Reine, fine stemmer, og publikum sette stor pris på heimekoret sitt.

Vyrde sin programleiar Sigbjørn Notøy er som skapt for akkurat den rolla. Med glimt i auget og snert i replikken tok han mellom songane publikum med på delar av Vyrde si 20 år lange historie.

Dirigent Øyvind Granden Berg var godt nøgd med den siste av jubileumskonsertane i år, og det er godt både å sjå og høyre Vyrde når dei kan noter og tekster og har latt notehefta ligg att heime.

Så var det pianotalentet Kristian Olav Vågen frå Gursken: Han hadde øvd heile Bohemian Rhapsody, spelte utan noter, og følgde dirigenten som ein godt erfaren pianist. Han fekk solid applaus frå publikum, og Vyrde takkar så mykje for det fine akkompagnementet!

Vi vonar Kristian kan vere med på fleire oppdrag seinare, og vi ønskjer lukke til med speleoppdraga han har i førjulstida!

Hareidstemnet er historie, men nye kapittel skal skrivast. Vyrde øver no fram til julekonsertar saman med Sirene i Ørsta kyrkje og Gursken kyrkje 11. og 12 desember. Begge dagar startar konsertane kl 18.00.

 19.desember kl 16 er det Sandetun som får besøk av Vyrde, og kl 17 same dag er koret å høyre i Larsnes kyrkje.

Vyrde har fått den ære å opptre på Hareidstemnet med konsert saman med Vox Virorum frå Hareid. Dette er ein konsert som er med å markere 20-årsjubileumet til Vyrde dette året.

Konserten vert i Hareidhallen søndag 24.oktober kl 17. Her vil publikum få høyre dei beste songane og dei løyaste historiane frå Vyrde sitt rikhaldige repertoar.

Sigmund prest har spurd om vi kan vere med på ei god song- og musikkstund i Gursken kyrkje søndag 14.november, og dette sa vi ja til med glede.

Julekonsertane i år vert saman med sjølvaste Sirene. Laurdag 11.desember er kora i aksjon i Ørsta Kyrkje, og søndag 12.desember er det Gursken Kyrkje som er staden for dei som vil ha ekte julestemning.

Elles er Vyrde i full gang med førebuingar til det som vert den store hendinga i 2011. Ved jonsoktider neste år kjem koret Bradlan frå Slovakia på gjenvisitt etter Vyrde sitt besøk der i mai i år.

Vi gler oss til å vise Bradlan den vakraste delen av Noreg, og konsertane vil bli høgdepunkta på opphaldet deira på Sunnmøre.

Vyrde Mannskor 20 år:  ”Frå Johan H. til Queen”

Det vert ei oppsummering av 20 rike songår i Vyrde Mannskor på Vonheim i Haugsbygda laurdag 24. april. Koret starta etter ein tilfeldig idè i 1990, og dei fleste som var med frå starten av syng framleis i koret. Resultatet er song på høgt nivå med m.a. topp-plassering i Noregsmeisterskapen for amatørkor, og det er framleis gneist, tyngde og snert av det karane framfører. Koret har ein sterk mannskor-tradisjon som botn i repertoaret, men det kjem stadig til songar som syner eit breiare spekter. I jubileumsåret har dei funne fram dei beste songane frå dei 20 åra koret har sunge. I tillegg til kyrkjemusikk, negro spirituals og populærmelodiar, vil de få høyre ein god-versjon av Bohemian Rhapsody av Queen - som vi også såg framført på TV på Det store korslaget. Håvard Voldnes er hyra inn på 88 tangentar.

Vyrde er topptrimma og klar til feiring. Velkomne til jubileumskonsert laurdag 24. april!

Herøy Janitsjar og  Vyrde Mannskor
held konsert på Vonheim i Haugsbygda 
førskomande laurdag 24. oktober kl 1800.

Kos deg med god variert song og musikk
Kaffi og Kaker